على قبر امى

السلام عليكم ورحمه الله وبركاته
يارب الكل يكون بخير

كلنا عارفين ان عيد الأم 21 - 3

يعنى بكرة ان شاء الله
لا صحيح خلاص النهارده الساعه عدت 12
ها حد لسه مجبش الهديه؟؟؟

ناس كتيرة نزلت توبكات عن الأم واتكلمت عنها بشكل حلو فى كل المنتديات
وعبرت عن حبها لأمهاتهم واتمنت طولت العمر لهم
وانا اكيد بضم ليهم صوتي وبقول ربنا يطول فى عمر كل أم في الدنيا يارب
ويخليلكم امهاتكم كلكم يارب وما تتحرموش من حنانها ابدا
على قبر امى Smile

بصراحه انا مش قادرة اصبر ولا امسك نفسى عن أنى اجى واتكلم معاكم عن الام والحنيه

ومش هتكلم عن نفسي ولا عن امي الله يرحمها بشكل خاص
انا هتكلم عن كل واحد يعيش الايام دي وهو تعيس
بيعيش الايام دي وهو بيتمنى انه لو كانت امه معاه
ويتمنى انه يفضل في حضنها ويحس بحنانها وفرحها بهديته

Crying or Very sad

لما بروح اقف على قبر امى الله يرحمها بفكر فى كل حاجه كانت بينى وبينها
اكيد كانت فى حاجات بعملها وماما كانت رفضاها و اكيد زعلتها منى فى يوم
اكيد احيانا صوتى على معاها وانا بكلمها اكيد مكنتش بقدر خوفها عليا لما
تمنعنى من خروجه او ترفضلى طلب معين هى شايفاه من وجهه نظرها مش لازم يتنفذ
بفكر فى حاجات كتيره محستهاش غير لما امى ضاعت منى

كمان بفكر في دلعها ليا وحبها وحنانها وحضنها اللي عمرى ما هلاقي زيه حضن فى الدنيا
بفكر في دموع فرحتها بيا وحضنها الجامد لما كنت بنجح كل سنه فى دراستى
بفكر في تضحياتها ليا انا واختى من يوم ما كنت طفله لغايه اخر لحظه فى
حياتها معايا حتى فى وقت مرضها وهى بتفضلنى عليها وبتطمن على اكلى وشربى
وكل حاجه تخصنى
بفكر و فكر وفكر وفكر

على قبر امى Sad

بجد بندم على كل لحظه زعلتها فيها وبشتاق وببكى على كل لحظه حلوة عشتها معاها وبشتاق لدفا حضنها اللى افتقدته

على فكرة انا مش عايزة اضايقكم بكلامى بس كل ده فضفضه من جوايا حبيت
اخرجها معاكم وخصوصا ان بكرة اول عيد ام هيمر عليا من غير ماما ما تكون
جنبى ومعايا وكمان من غير ما اشتريلها هديه وافرح وانا بقدمهالها واستنى
عشان اشوف فرحه الهديه ايه فى عنيها واسمع منها اجمل دعاء ليا من جواها من
غير ما تكون محتاجه منى حاجه لأ بتدعيلى بصدق قلب مش عشان الهديه لا عشان
هى امى اللى بتتمنالى دايما السعاده والصحه والستر وبدون مقابل تستناه
دلوقتى حالا
عايزة اقول لماما
انا بحبك اوى وانتى كنتى ومازلتى اغلى حاجه ليا فى الدنيا بحالها ومش هتتعوضى ولا هعوض حنانك ولا حضنك ابدا
عايزاكى كمان تسامحينى لو مرة زعلتك او غلطت فى حقك
لو خيرونى بجد بين الدنيا وبينك هختارك انتى

على قبر امى Wallbash

هطلب منكم طلب حالا اولا تحمدوا ربنا ان ماما موجوده معاكم ربنا يخليهالكم يا رب
روحوا بقى بسرعه حالا شفوها بتعمل ايه واحضنوها وبسوها ولازم تعملوا كده لانى هشوفكم اصلكم متراقبين
هههههههههههههه
على قبر امى Biggrin

دى نعمه من ربنا مش بيحس بيها غير اللى اتحرم منها وضاعت منه
على فكرة عيد الام مش بس الاحتفال بيه باننا نجيب الهدايا ونزل التوبيكات والمواضيع ونتكلم
لا لازم نشوف النهارده احنا بنغلط فى ايه مع امهاتنا وايه اللى بنعمله وبيزعلها مننا ونحاول نغير كل ده للى يرضيها ويسعدها
كمان يوم زى ده مش لازم يكون بس يوم 21مارس لاااااااااا
ده لازم يكون الاحتفال بامهاتنا كل يوم وكل ساعه وكل دقيقه كمان
كفايه انها جابتنا للدنيا وكبرتنا وعلمتنا وخافت علينا وخلتنا حد نفتخربيه فى الدنيا دى

قال
الله تعالى:{وَقَضَى رَبُّكَ أَلا تَعْبُدُوا إِلا إِيَّاهُ
وَبِالْوَالِدَيْنِ إِحْسَانًا إِمَّا يَبْلُغَنَّ عِنْدَكَ الْكِبَرَ
أَحَدُهُمَا أَوْ كِلاهُمَا فَلا تَقُلْ لَهُمَا أُفٍّ وَلا تَنْهَرْهُمَا
وَقُلْ لَهُمَا قَوْلا كَرِيمًا*وَاخْفِضْ لَهُمَا جَنَاحَ الذُّلِّ مِنَ
الرَّحْمَةِ وَقُلْ رَبِّ ارْحَمْهُمَا كَمَا رَبَّيَانِي صَغِيرًا}

جاء رجل إلى رسول الله صلى الله عليه وسلم فقال :
يا رسول الله ، من أحق الناس بحسن صحابتي؟
قال : ( أمك ).
قال : ثم من؟
قال : ( ثم أمك ).
قال : ثم من؟
قال : ( ثم أمك ).
قال : ثم من؟
قال : ( ثم أبوك ).

لو فكرتم فى الناس اللى مش هتفرح فى اليوم ده هتحمدواربنا مليون مرة في اليوم عالنعمه اللي اداهولك
ومن كل قلبي بقول للكل ربنا يخليلكوا امهاتكوا ويطول في عمرهم يارب
وتفرح بيكوا ان شاء الله وعلى طول تبقوا مع بعض
و كل سنه و كل الامهات بالف مليون خير
وربنا يرحم كل أم فارقت الدنيا دي
معلش عشان طولت كتير
بس والله فى كلام كتييييييييييير جوايا لسه مخرجتوش

بس الحمد لله على كل شئ

فراوله

فراولة

فى الحقيقة انا مهما اتكلمت او قولت اى كلام
مش هاقدر اعبر زى كلامك بجد
وبجد انا فى منتهى السعادة انك موجودة معنا
وانى بجد عرفت حد زيك جميل كدا وبدعيلك ربنا يصبرك
ويارب تكونى اجمل أم فى الدنيا
وحقيقى انا مش لاقيه كلام اقوله
بجد ربنا يوفقك يا حبيبتى ويسعدك فى حياتك
وتاكدى تماما طول ما انتى سعيدة فى حياتك وبتعملى كل شئ يرضى ربنا اكيد ماما الله يرحمها هتكون راضية عنك حتى وهى مش موجودة فى الدنيا
وشايفاكى لكنها حاسه بيكى طول الوقت

flower

مع خالص اشواقى
أنــــــســـــــانـــــة حــــالـــــمـــــــة